Igiling mo ang iyong bewang
Akitin mo ang mga lalaking hunghang
Landiin mo hanggang pera nila’y ihampas sa’yong katawan
Hanggang maulol sila sa angkin mong kagandahan
“Sayaw Nene, sayaw Nene”
Dagdagan mo pa ang kolorete sa’yong mukha’t
Siguraduhin mong matatakpan lahat ng sugat
Pati na rin ang iyong pangit na peklat
Sa salami’y humarap bago sa entablado’y umakyat
“Sayaw Nene, sayaw Nene”
Hanggang ang takong mo’y masira
Hanggang ang dignidad mo’y mabura
Galingan mo ang paggiling sapagkat may mga bago nang salta
At ika’y matanda na at hindi na mabenta
“Sayaw Nene, sayaw Nene”
Ipilit mo ang ‘yong katawan sa iba
Magtiwalang may maaakit ka pa
Pigilan mo ang iyong luha sa mata
Kahit ika’y gamit na gamit na, siguradong sila’y matutulala pa
“Tigil na Nene, tigil na”
Ang pagsayaw ay itigil na
Sa ganitong kalakara’y ika’y laos na
Pagkatapos gamitin ang iyong katawa’y ngayo’y ika’y itinapon na
Wala nang tumatanggap sa angkin mong ganda
“Tahan na Nene, tahan na”
Ang kolorete’y alisin na
Ang musika’y tumigil na
Kaya’t sa pagsayaw ika’y huminto na
Sa pag-iyak ika’y tumahan na
“Laya ka na Nene, laya na”
Ang iyong katawa’y malaya na
Mga kamay na humahaplos ay tumigil na
Kaya’t sa pagsayaw ika’y huminto na
Ang iyong katawa’y pag-aari mo na
"Lipad na Nene, lipad"
Ibuka mo na ang iyong mga pakpak
Wala ng rason upang ika'y patuloy na umiyak
Iyo na muli ang 'yong katawa't dignidad
Kaya't tunguhin na ang paraiso’t ika'y malayang lumipad
Artikulo: Pexcel John Bacon
Dibuho: Kurt Aguilar Mendez
コメント