sana sa pasko, kasama rin kita

pilitin mang maging masaya

alisin ang inggit na nararamdaman sa iba

minsan napapaisip ako...

sana sa pasko, kasama rin kita

nasa iisang hapag-kainan

kasama ang aking pamilya

habang kinukumusta nila tayo’t

ikinukuwento ang isa't isa

pagkatapos ay kakausapin ka ni papa

aayain sa inuman

pero sasawayin siya ni mama

kasi ayaw niyang malasing ka

susubukan mo na lang magligpit sa kusina

pero isa ka pa ring sasawayin ni mama

dahil ang gusto niya pala

magkasama't masaya lang tayong dalawa

kaso ang imposible pa pala nito ngayon

pareho pa kasi tayong nakatago sa kloseta

para ring regalo sa ilalim ng christmas tree

balot na balot pa

masaya pa rin naman ang pasko

kasi alam kong may “tayong dalawa”

pero sadya lang talagang may kulang

kasi hindi kita kasama

kaya kung totoo man si santa claus

gusto kong humiling sa kaniya

sana maamin na natin sa kanila

para sa susunod na pasko, kasama na kita.

Article: Earies Porcioncula

Dibuho: Nazia Ashley Gestopa